20 سالہ نوجوان دنیا کا سب سے پستہ قامت شخص قرار

افشین اسماعیل / فوٹو بشکریہ گنیز ورلڈ ریکارڈز
افشین اسماعیل / فوٹو بشکریہ گنیز ورلڈ ریکارڈز

ایران سے تعلق رکھنے والے 20 سالہ افشین اسماعیل کو دنیا کا سب سے پستہ قامت شخص قرار دیا گیا ہے۔

گنیز ورلڈ ریکارڈز کے مطابق افشین اسماعیل کا قد 2 فٹ 1.6 انچ ہے اور وہ کولمبیا کے ایڈورڈ نینو سے 2.7 انچ چھوٹے ہیں، جن کے پاس پہلے یہ ریکارڈ موجود تھا۔

گنیز ورلڈ ریکارڈز کی جانب سے دبئی میں افشین اسماعیل کے قد کی جانچ پڑتال کرنے کے بعد عالمی ریکارڈ کا سرٹیفکیٹ جاری کیا گیا۔

ایران کے صوبہ مغربی آذربائیجان کے ایک گاؤں میں پیدا ہونےو الے افشین اسماعیل کی زندگی آسان نہیں گزری۔

پیدائش کے وقت ان کا وزن محض 700 گرام تھا / فوٹو بشکریہ گنیز ورلڈ ریکارڈز
پیدائش کے وقت ان کا وزن محض 700 گرام تھا / فوٹو بشکریہ گنیز ورلڈ ریکارڈز

ان کے والدین کو بیٹے کے قد کے بارے میں اس وقت علم ہوا جب افشین کی عمر 2 سال تھی، جبکہ پیدائش کے وقت ان کا وزن محض 700 گرام تھا اور اب ان کا وزن لگ بھگ ساڑھے 6 کلوگرام ہے۔

افشین پیدائشی طور پر ایک جینیاتی مرض سے متاثر ہیں جس کے باعث ان کا قد چھوٹا رہ گیا، ان کے خاندان کے کئی افراد کا قد بھی چھوٹا ہے مگر افشین جتنا چھوٹا کسی کا نہیں۔

والدین کی آمدنی زیادہ نہ ہونے کی وجہ سے بچپن میں افشین کا علاج نہیں ہوسکا تھا۔

قد چھوٹا ہونے کی وجہ سے افشین کو اسکول جانے کا موقع بھی نہیں مل سکا اور تعلیم کا حصول مشکل ہوگا، البتہ رشتے داروں کی جانب سے افشین کو کچھ چیزیں پڑھائی گئی ہیں۔

اپنے آبائی علاقے میں افشین بہت زیادہ مقبول ہیں اور ان کے اپنے الفاظ میں ‘جہاں بھی میں جاتا ہوں لوگ مجھے سراہتے ہیں، میرے بہت زیادہ دوست ہیں’۔

افشین اسماعیل اپنے والدین کے ساتھ / فوٹو بشکریہ گنیز ورلڈ ریکارڈز
افشین اسماعیل اپنے والدین کے ساتھ / فوٹو بشکریہ گنیز ورلڈ ریکارڈز

لوگوں کی توجہ ملنے سے افشین کو خوشی ہوتی ہے اور ان کا کہنا ہے کہ ‘متعدد افراد نے سوشل میڈیا پر میرے ساتھ تصاویر کھچوا کر مجھے مقبول کیا، میں زیادہ دیر تک موبائل فون کو استعمال نہیں کرسکتا کیونکہ اس کا وزن زیادہ ہوتا ہے مگر فون سے مجھے لوگوں سے تعلق بڑھانے میں مدد ملتی ہے’۔

دبئی میں افشین نے اپنا ایک بڑا خواب بھی اس وقت پورا کیا جب انہیں دنیا کی طویل ترین عمارت برج خلیفہ جانے کا موقع ملا۔

افشین زیادہ تر کارٹون اور سوشل میڈیا استعمال کرکے وقت گزارتے ہیں، ٹام اینڈ جیری ان کا پسندیدہ کارٹون ہے۔

اسی طرح افشین کو فٹبال کا بھی بہت زیادہ شوق ہے اور وہ لیونل میسی کو پسند کرتے ہیں مگر ان کے خیال میں فٹبال ورلڈکپ ٹرافی اس بار بھی فرانس کے نام رہے گی۔