شوکت ترین جھوٹ بولنا بند کریں، ہمارے لیے ملک کا مفاد مقدس ہے: مفتاح اسماعیل

آپ کیلئے عمران خان اہم ہوں گے ہمارے لیے ملک کا مفاد مقدس ہے: وزیر خزانہ کی شوکت ترین پر تنقید— فوٹو: فائل

وفاقی وزیر خزانہ مفتاح اسماعیل نے سابق وزیر خزانہ شوکت ترین کو شدید تنقید کا نشانہ بنایا ہے۔

پریس کانفرنس کرتے ہوئے مفتاح اسماعیل کا کہنا تھاکہ شوکت ترین نے واضح کہا کہ ہم ان کو اسکاٹ فری نہیں جانے دیں گے، آپ کیلئے عمران خان اہم ہوں گے ہمارے لیے ملک کا مفاد مقدم ہے، کیا آپ نے معاہدہ نہیں کیا کہ پیٹرول پر ہر ماہ ٹیکس بڑھائیں گے؟ عمران خان تو ملک کا قرض کم کرنے آئے تھے کیا یہ قرضہ کم کیا؟ آپ آئی ایم ایف کی چھٹی کرارہے تھے یا پاکستان کی؟

انہوں نے کہا کہ شہبازشریف نے ایک دن بھی پیٹرول کی قلت نہیں ہونے دی لوڈشیڈنگ ختم کی، 40 لاکھ سے زیادہ سیلاب متاثرہ خاندانوں کو 25 ہزار روپے ماہانہ دے رہے ہیں، 60 سے 70 ارب روپے خرچ ہوں گے لیکن متاثرین کو پیسے دیں گے وہ مشکل میں ہیں۔

ان کا کہنا تھا کہ سیلاب سے علاقے، فصلیں تباہ ہوگئیں اور آپ سیاست کررہے ہیں، 10 سال سے خیبرپختونخوا میں تحریک انصاف کی حکومت ہے پوچھیں وہاں صحت اور تعلیم کا کیا حال ہے؟ کیا آپ نے آئی ایم ایف کو نہیں کہا تھا کہ اپریل میں پیٹرول کی قیمت بڑھا دیں گے؟

مفتاح اسماعیل کا کہنا تھا کہ کوئی کیسے یہ فون کرسکتا ہے کہ یہ خط لکھو کہ آئی ایم ایف کی ڈیل رک جائے، جن کی بیگمات انگوٹھیاں لے لیتی ہیں، زیورات لے لیتی ہیں وہ ہمیں سبق دیں گے؟ حقیقی آزادی والے کیا 500 ارب کا خسارے کرکے جاتے ہیں۔