اماراتی ہلال احمر کیجانب سے بلوچستان اور سندھ کے 15 ہزار سیلاب متاثرین میں امداد تقسیم

فوٹو:اسکرین گریب

سندھ اور بلوچستان میں حالیہ تباہ کن بارشوں سے متاثر ہونے والے پاکستانیوں کی مدد کے لیے اماراتی ہلال احمر اور قونصلیٹ کا عملہ گزشتہ کئی ہفتوں سے سرگرم ہے۔

اماراتی ہلال احمر کی ایک ٹیم بلوچستان جبکہ دوسری سندھ میں سیلاب سے متاثرہ علاقوں میں امدادی سرگرمیاں جاری رکھے ہوئے ہے۔

ان علاقوں میں حالیہ مزید بارشوں نے لوگوں کی زندگیوں کو نہ صرف اور مشکل بنا دیا بلکہ امدادی سرگرمیاں بھی شدید متاثر ہوئی ہیں۔

ذرائع کے مطابق حمد بخیت الرمیتی کی سربراہی میں اماراتی ہلال احمر کے وفد کا بلوچستان کے ساتھ ساتھ سندھ کے کئی اضلاع میں اب تک لگ بھگ 15ہزار خاندانوں میں راشن اور ٹینٹ تقسیم کر چکے ہیں اور یہ سلسلہ جاری ہے۔

اماراتی ہلال احمر چیف حمد بخیت الرمیتی کا کہنا تھا کہ علاقے کے حالات کو دیکھتے ہوئے، ہماری کوشش ہے کہ مزید امدادی سامان کی فراہمی کا بندوبست کیا جائے، تاہم سڑکیں ٹوٹ جانے، راستوں کی بندش اور موسم کی خرابی کے باوجود ہماری ٹیمیں مختلف علاقوں میں کام کر رہی ہیں۔

انہوں نے مزید کہا کہ اماراتی ہلال احمر، اس مشکل کی گھڑی میں پاکستانی عوام کے ساتھ کھڑا ہے۔